AKAUZAZTE: "AKAUZAZTE DANOK"
AKAUZAZTE DANOKen jardueraren gune nagusia garai bateko Azkoitiko (Gipuzkoa) hiltegia da. Han ditu taldeak entseatzeko lekua eta beraien diskoak eman dituen grabaketa estudioa. 1992az geroztik, mataderoko txoko-erraien ilunean aritu dira lanean, eta han eman diote musika jitea bere bisio eta amesgaiztoei, han askatu dituzte bere obsesiorik sakonenak. AKAUZAZTE DANOK 2002-2008 artean grabatu zen. Urte horietan hiruko taldea, isilik jardun du euren armak zorrozten, diskoko piezak grabatu, berriro grabatu, garatu eta eraldatzen. Etengabeko progresio eta metamorfosian egonik, itxura anitzeko diskoa izan zitekeen, hau horietako bat baino ez da. Aurreko diskoetan jorratutako ildotik jotzen du AKAUZAZTE DANOK. Primitibotasuna eta abangoardia elkarren eraginean dakarren musika, sonoritate industrialak, euskal folkloreko zein Asia eta Afrikako musika tradizionala, gorreria lekarkeen distortsioa, ezinegona sortzen duen zati akustikoa, loop obsesiboak eta manipulazio elektronikoa. AKAUZAZTE DANOKen 59 minutuetan gitarra elektriko eta akustiko desberdinek, loop desberdinek eta egitura melodiko desberdinek pixkanaka baina aldi berean modu intentsuan garatzen dira. Oharkabean guztiz harrapatzen gaituen sare sendoa osatzen dute eta motel-motel ito egiten gaitu. Taldeak osatzen dituen ehundurak urratzaileak dira, latzak, lakarrak, gogorra. Doinu blokeak behin eta berriz errepikatzen dira eta eragin hipnotikoa dute, jatorri tribaleko perkusioak
egiturari erritmo irmoz eta indar basatiz eusten dion bitartean. Edertasun bereziarekin batera basa izaera ikaragarria du ikuskizunak. Pieza hertsi eta zail bezain askatzaile eta katartikoak. Hau beste batek abesteko egiña izan zen kantaren txalaparta, txori eta ezkila hotsekin hasten da diskoa. Ekaitzaren aurreko barealdia da, gero etorriko den horretarako prestatzen gaituen lasaitasuna. Testua indartzen joaten da pixkanaka, doinu harresitu eta zarata labirintoen bidez tentsioa pilatzen da eta horrekin batera, sorgin bilakatzeko formula-testua errezitatzen dute ahotsek. Lehertzear legokeen sumendi baten antzera, indarra eta energia suma daiteke pieza guzti hauen errai-muinaren baitan eta hainbatetan zarata iraultzaileko leherketetan eta oinarri- oinarrizko taupadetan gauzatzen da; Gure etxean gaude edo Baten (2) esaterako.Ezari emanak edo Badaude bezalakoetan giro ezatsegin eta misteriotsuak pazientziaz garatzen dira, eta trantzerik sakonenean murgilarazten gaituen tentsio bildu eta disonantez osatutako mantra soniko eta elektrizitate estatikoarekin sortzen dira. Zeharkako mehatxuz eta edertasun morbidoz bustitako tonu atmosferiko-anbientala eragiten duen Armagedon abestiarekin bukatzen da diskoa. Zeharkatu ezin diren ehundura elektroniko lokartuak dariola, txalaparta sartzen da beste behin ere, eta horrela ixten da diskoa hasieran hasitako zikloa. Akauzazte Danok, Akauzazteren birsortzea 2009an. Etengabe bide berri eta ezezagunetan murgiltzen den taldea dator argira, sortu eta eraitsi egiten duen taldea. Bibrazio monolitiko, garbi, magnetiko eta ederrez astintzen gaituen lana, lurretik hartzen duten energia tarteko, lurrean bertan txertatzen diren abestiak, naturaren erritmoari lotuta eta aldi berean, argia eman eta suntsitzen duten indar teknikoekin sintonian.
